Top 4 sa drug priority list sa Iloilo City dakup sa drug buy bust operation sa Molo
Dakup ang Top 4 sa Drug Priority List sa Iloilo City sa drug buy bust operation sa Barangay West Habog-Habog, Molo kaina sang aga.
Suno kay Police Captain Ryan Christ Inot, head sang City Drug Enforcement Unit, nalakip man ang subject nga si alyas Mako, residente sang amo nga barangay, sa Case Operation Plan (COPLA) sang Philippine National Police (PNP) kag Philippine Drug Enforcement Agency (PDEA) sa diin prayoridad nga madakup siya gilayon.
Dugang ni Inot, nakaagi preso ang subject sa kaso may kaangtanan sa illegal nga druga sang 2022 kag robbery sang 2024.
Sa monitoring sang police, may nagadul-ong sang supply sang illegal nga druga sa balay sang subject ukon sa fish port sa diin siya nagabaligya sang isda. Samtang ginkadtuan siya sang mga mabakal sang illegal nga druga nga nagahalin sa City Proper, Molo kag La Paz.
Nakuha kay Mako ang apat ka sachets sang suspected shabu nga ginabanta nagabug-at sang 30 gramos kag may estimated value nga P204,000. — Aksyon Maria Kayla Tingzon
