Stay-in driver ni LTO 6 Dir. Gaudioso Geduspan patay sang gintiro sa Pavia

ILOILO — Patay ang lalaki sang gintiro sa sulod sang Parc Regency Residences sa Brgy. Ungka II, Pavia kagab-i, Abril 3.

Ini ang ginkumpirmar ni Police Major Harold Rendora, officer-in-charge sang Pavia Municipal Police Station.

Suno kay Rendora, pasado las-9:30 kagab-i sang natabo ang krimen.

Nagakulob sa higad sang dalan ang biktima nga stay-in driver ni Land Transportation Office 6 Director Gaudioso Geduspan.

Nadakpan sang Sara police ang duha ka suspek sa krimen.

Ginkilala ang mga suspek kanday alyas Boy,45-anyos kag alyas JR, 40-anyos nga mag-utod suno sa police.

Suno kay Police Major Jose Nemias Pamplona, hepe sang Sara Municipal Police Station, pagkatapos makabaton sang report nga may shooting incident sa Pavia kag nagpalagyo ang mga suspek, gilayon naghimo sang checkpoint ang kapulisan.

Nakasakay sa puti nga Isuzu Crosswind ang mga suspek base sa nabaton nga impormasyon.

Una nga nagplastar ang Sara police sa dalan pakadto sa Concepcion agud mabantayan ang mga suspek pero nagsaylo sila tungod may iban na nga team ang nagabantay malapit sa area.

Didto kag nagsaylo sa Brgy. Aspera, Sara kag pakadto sa Lemery nga direksyon ang kapulisan.

Magluwas sa description sang salakyan may ginhatag man ang Pavia police nga plate number sang getaway vehicle rason nga sang nagdulog sa checkpoint ang Crosswind kag gin-aresto ang mga sakay.

Gindala sa Sara Police Station ang mga sakay sang salakyan agud ma-usisa nga sa ulihi na-identify nga mga suspek sa shooting incident sa Pavia tungod sa CCTV footage nga ginpakita sang Pavia police.

Wala na-recover ang pusil nga gingamit sang mga suspek sa sulod sang salakyan suno kay Major Pamplona tungod ginhaboy sang mga suspek.

Yara sa kustodiya sang Sara Police Station ang mga suspetsado. — Aksyon Paula Elambayo