Welder patay sang ginbuno sa Mandurriao

ILOILO CITY — Patay ang 48-anyos nga welder nga ginbuno sa boarding house sa Brgy. Taft North, Mandurriao sang Abril 2.

Ginkilala sang police ang biktima kay Fred, 48-anyos, samtang ang suspek amo si Mark nga live-in partner sang boardmate sang biktima.

Suno kay Bebang nga isa sa mga boarders, una niya nakita nga nagsulod si Fred sa kwarto sang live-in partner ni Mark.

Nagatinir si Mark sa lain nga boarding house sa Jaro.

Sang amo nga tiyempo, wala pa si Mark sa kwarto kag bukas man ang pwertahan samtang naga-istoryahanay ang biktima kag ang live-in partner ni Mark.

Pasado las-12:30 kahapon sang kaagahon sang may nabatian si Bebang nga nagahilibiun kag nagaginahod.

Bukas ang kwarto sang live-in partner ni Mark gani nagsulod siya agud sawayon si Mark kag pagguwaon tungod ginakastigo ang iya ka-live in.

Nakita naman ni Bebang sa kwarto si Fred nga nagaduko kag sa iya pagdumdom natulugan lang.

Nagpangayo sang bulig si Bebang sa iya partner sa pihak nga kwarto agud sayluhon si Fred pero wala na ang mag-live in partner pagbalik nila. Natukiban nila nga wala na nagahulag si Fred kag may pilas.

Sa imbestigasyon sang police, pagpangimon ang isa sa mga ginalantaw nga motibo sa krimen.

Wala na-recover ang gingamit sa pagbuno, suno sa police.

Ginpa-autopsy ang bangkay sang biktima nga may pilas sa likod sang wala nga dulunggan. — Aksyon Paula Elambayo