Hepe sang Pavia Police Station gin-relieve may kaangtanan sa shooting incident sang Abril 3
Gindagdagan sang Administrative relief si Major Harold Rendora ang hepe sang Pavia Municipal Police Station.
Ini ang ginkumpirmar ni Iloilo Police Provincial Office (IPPO) director Police Colonel Bayani Razalan.
Ginpaathag ni Razalan nga ang Administrative relief ang temporaryo nga pagkuha sa puwesto sang hepe kag pagsaylo sa IPPO headquarters samtang nagapadayon ang imbestigasyon sa nagluntad nga shooting incident sa Brgy. Ungka 2, Pavia sang Abril 3 sang gab-i.
Napatay sa pagpangtiro ang personal driver ni LTO 6 Regional Director Atty. Gaudioso Geduspan nga si Wilmer Villarosa.
Ginpabutyag ni Razalan nga ginhimo ang mandu tungod antes ang insidente, nagpalapit na si Geduspan sa Pavia police tungod may pamahog sa ila kabuhi pero ginpahayag nga wala nahatagan sang ensakto nga aksyon ni Major Rendora.
Nag-request ang IPPO sa Comelec nga mangin caretaker sang Pavia Municipal Police Station si Major Dadje Delima nga anay hepe sang amo nga estasyunan.
Kon aprubahan sang Comelec ang request sang IPPO, si Delima ang magapanguna sa imbestigasyon sa nagluntad nga krimen sa nasambit nga barangay.
May himuon nga separado nga imbestigasyon ang Provincial Investigation and Detective Management Unit kag Provincial Intelligence Unit sang IPPO agud napamatud-an nga nahimo ni Rendora ang iya nga obligasyon sang siya ang nagapungko nga hepe.
Kon mapamatud-an nga nahimo niya ang iya obligyasyon bilang hepe, ibalik siya Pavia MPS.
Epektibo subong nga adlaw ang order. — Aksyon Farrah Mae Morano
