Hublas nga lalaki nagsaka sa atop sang overpass sa General Luna St., City Proper

ILOILO CITY — Gin-rescue sang mga nagresponder nga bombero ang hublas nga lalaki nga nagsaka sa atop sang overpass sa General Luna Street, City Proper kaina sang aga.

Suno kay SFO2 Leondy Hulleza, Battalion Chief sang Iloilo City Fire Station, wala nagwaras ang lalaki samtang gina-rescue siya.

Sang ginpamangkot sang mga rescuers sa rason sang iya pagsaka sa atop, nagpabutyag ang lalaki nga nagutom siya.

Nangin pagpanghangkat naman suno kay Hulleza ang pagpapanaug sa lalaki tungod may mga live wire nga natandog.

Ginabanta 25 feet ang kataason sang overpass halin sa duta tubtob sa atop.

Ginbulong kag ginpakaon sa ambulansiya ang lalaki.

Suno sa mga nagalabay sa lugar, masami nga nagatiner sa overpass ang lalaki kag nagapangayu-kayo.

Kahapon sang hapon sang may nakakita pa sa lalaki sa overpass nga nagasinggitan tubtob maggab-i.

Kaagahon sang nakita ang lalaki nga yara na sa atop sang overpass.

NAKILALA NA

Suno sa police, nakilala ang lalaki sang gin-check kon may record siya sa police sa diin natukiban nga involved siya sa madamo na nga insidente sang pagpangawat sa siyudad.

Sa impormasyon sang Iloilo City Police Station, residente sang Boulevard, Molo ang lalaki nga ginabanta 30-anyos.

Ginalantaw nga mentally distressed ang lalaki suno sa police tungod hublas siya sang gin-rescue sang mga personnel sang Iloilo City Fire Station kag Special Rescue Force. — Aksyon Maria Kayla Tingzon