Lalaki nga ginatudlo nagapang-bully patay sang ginbuno sa Molo

ILOILO CITY — Pilas sa likod kag ulo ang naagum sang 43-anyos nga lalaki sang ginbuno sa Barangay Calumpang, Molo Abril 5 sang gab-i.

Suno kay Police Captain Ryan Christ Inot, officer in charge sang Molo Police Station, ginkadtuan sang suspect nga si alyas Michael, 32-anyos, ang biktima nga si Joseph sa ila balay tungod napuno na siya sa ginasugid nga pagpang-bully sang biktima sa iya manghod nga 23-anyos.

May bitbit na nga kutsilyo si Michael samtang nagapakadto sa balay ni Joseph. Wala na sang komprontasyon nga natabu sang ginbuno sang suspect ang biktima.

Napatay ang biktima samtang ginabulong sa ospital. Wala na nakapalagyo ang suspect. Nag-ako naman siya nga naka-inom suno sa police.

Pasakaan sang kaso nga homicide ang suspect nga yara na kustodiya sang Molo police. — Aksyon Maria Kayla Tingzon