Lalaki patay sang gintiro sang riding-in-tandem sa Dumangas

ILOILO — Patay ang 23-anyos nga lalaki sang gintiro sang riding-in-tandem sa Barangay Sulangan, Dumangas Sabado sang kaagahon, April 5.

Suno kay Police Master Sergeant Efren Gonzaga, imbestigador sang Dumangas Municipal Police Station, pagkatapos dul-ong sang biktima nga si Angelo Gonzales sa iya abyan sa Bangga Quarry nga sakop sang Barangay Sulangan, may nagpalapit sa iya nga riding-in-tandem kag gintiro siya sang angkas.

Na-capture sa CCTV camera nga nag-istoryahanay pa ang biktima kag mga suspects antes ang pagpangtiro.

Wala sang suksok nga helmet ukon bisan ano nga tabon sa hitsura ang mga suspects gani ginalantaw sang police nga tumandok sila sang banwa.

Halin sa baylehan ang biktima kag iya abyan kag naka-inom na tungod bisperas sang fiesta sa barangay.

Ginalantaw sang police nga halin sa gym sang barangay, ginsundan na sang suspects ang biktima.

Sa pagpangusisa sang police, may komosyon sa gym sa diin involved ang biktima pero wala naga-anggid ang hitsura sang iya nakabais sa mga suspects.

May persons of interest na ang kapulisan kag daan nga hiligut-anon ang ginasundan nga motibo sa krimen.

Nakaagum sang pilas sa tiyan kag likod ang biktima nga gintunaan sang iya kamatayon.

Na-recover sa lugar ang duha ka basiyo sang caliber 45. — Aksyon Maria Kayla Tingzon