Mag-asawa patay sang nakuryente samtang nagapanghagbas sa talamnan sa Janiuay
ILOILO — Patay ang mag-asawa sang nakuryente samtang nagapanghagbas sa talamnan sa Brgy. Jibolo, Janiuay sang Abril 8 sang gab-i.
Suno kay Police Captain Hector Ayagan, hepe sang Janiuay Municipal Police Station, nagkadto sa talamnan ang mag-asawa kahapon sang aga agud manghagbas sang hilamon kag i-check ang mga tanom nga utanon.
Sa imbestigasyon sang police, pasado las-6 kahapon sang aga sang nagkadto sa talamnan ang mag-asawa kag wala na nakapauli sang udto.
Pasado las-5 sang hapon, natingala ang pamilya sang mga biktima nga wala sila nakabalik gani nagdesisyon nga makadto sa talamnan. Didto nakit-an ang mag-asawa nga may mga paso sa kamot kag butkon.
Posible wala natalupangdan sang mag-asawa ang kudal sang tupad nga manokan nga may linya sang kuryente tungod sa mga hilamon.
Suno sa police, may kuryente ang kudal sang manokan tungod makapila na ka beses na ginkawatan.
Wala na ginpa-autopsy ang mga biktima suno sa police, samtang nagpabutyag ang tag-iya sang manokan nga mabulig sa mga balayran sa pagpalubong. — Aksyon Paula Elambayo
