Masobra P800K nga balor sang suspected shabu na-recover sa 2 ka HVIs sa Leganes

ILOILO — Arestado ang duha ka indibidwal sa drug buy-bust operation sa Brgy. Lapayon, Leganes kagab-i, Abril 8.

Ginkilala ang main subject kay Alyas Toks, 25-anyos, residente sang Brgy. Lupa, Sta. Barbara, Iloilo kag ginakabig nga high-value individual (HVI) drug personality.

Nadakpan man sa operasyon si Alyas Moymoy, 27-anyos, residente sang Zone 5, Sta. Barbara, Iloilo.

Suno kay Police Major Dadje Delima, head sang Iloilo Provincial Drug Enforcement Unit (PDEU), Nobyembre sang nagligad nga tuig sang ila gin-target kanday Toks kag Moymoy pero gin-disregard sang duha ang transaksyon sa Sta Barbara. Liwat nga nakabaton sang impormasyon ang kapulisan sang mga transaksyon sang duha ka subject gani natigayon ang pag-aresto sa ila subong nga gab-i.

Nagalab-ut sa 2nd district, 3rd district, kag porsyon sang Iloilo City ang pagbaligya sang mga subject.

Na-recover sa mga subject ang 120 grams sang suspected shabu nga may standard drug price nga P816,000.