Senior citizen patay sang nagbungguanay ang 2 ka motorsiklo sa Igbaras

ILOILO—Gindeklarar nga dead-on-arrival sang gindala sa ospital ang 63-anyos nga lalaki sang nakabunggo ang ginamaneho niya nga motorsiklo sa nasumalang nga isa pa ka motorsiklo sa Barangay Santa Barbara, Igbaras sang Abril 9.

Suno kay PCAPT Francis Donne Lomahan, hepe sang Igbaras Municipal Police Station, halin sa Brgy. Bagacayan ang motorsiklo nga ginamaneho sang babaye nga ginabanta naga-edad 40 kag padulong sa direksyon sang banwa, samtang halin naman sa Brgy. San Ambrosio ang motorsiklo nga ginamaneho sang senior citizen kag ginasubay ang dalan nga pa-Miagao.

Base sa pag-imbestigar sang police, nag-overtake pa-inner lane ang motorsiklo nga ginamaneho sang babaye sa ginasundan niya nga tricycle.

Sang nag-overtake, nasumalang niya ang isa pa ka motorsiko nga halin sa kurbadahon nga dalan.

Tungod sa impact, natumba kag naghuray-ad sa dalan ang duha ka mga drivers.

Lunsay may mga suksok man nga helmet ang duha ka drivers.

Wala na natabangan ang senior citizen sang gindala sa ospital, samtang padayon naman nga ginabulong ang babaye sa Western Visayas Medical Center.

Wala pa naka-istoryahanay ang pamilya sang magtimbang nga bahin angut sa natabo. — Aksyon Marvin Malificiar