Construction worker nagsaka sa tower signage sa Diversion Road, Mandurriao para sa iya Facebook content

ILOILO CITY — Para sa content sa Facebook ang rason sang lalaki nga nagsaka sa tower signage sang Plazuela Uno sa Diversion Road, Mandurriao sang Abril 10

Ini ang gintuad ni Alyas Boy agud ma-monetize ukon makuwartahan ang iya Facebook paagi sa paghimo sang content.

Nagaproblema siya suno sa iya, sa galastuhon sa pagpa-ospital sa iya bata nga nagabalatian. Luyag man niya nga baklan sang wheelchair ang iya iloy tungod nabudlayan nga makalakat.

May dala nga speaker si Alyas Boy tungod plano niya kuntani nga magsaot sa ibabaw sang tower signage. May dala man siya nga tirador kag kawayan nga ginpataliwis agud nga gamiton niya kuntani nga props sa pagsaot.

Sa pagpangusisa sang Aksyon Radyo Iloilo, ginakulang si Boy nga taga-Janiuay nga nagatrabaho bilang construction worker.     

Sang nakita nga yara sa ibabaw sang tower signage, gilayon nga gintawgan sang police rason nga na-istorya siya kag matawhay nga nag-upod sa pagpanaog.

Nagpangayo naman sang pasaylo si Boy sa mga na-alarma sa iya ginhimo.