Lalaki nga ginreklamo nagpalupok sang pusil sa Pavia pilason sang nagbato sa kapulisan
ILOILO — Estable na ang kondisyon sang 34-anyos nga lalaki nga ginreklamo nagpalupok sang pusil kag natiruhan sang nagbatu sa police sa Brgy. Balabag, Pavia kagab-i, Abril 12.
May pilas sa wala nga butkon ang lalaki nga ginkilala kay Joel Dalisay residente sang amo nga barangay.
Suno kay Police Major Jose Nemias Pamplona, officer-in-charge sang Pavia Municipal Police Station, nakabaton sila sang tawag nga may lalaki nga nagapalupok sang pusil.
Sang nagresponde ang kapulisan sa lugar, ginpahayag ni Pamplona nga nagsulod sa iya balay ang lalaki kag nagkasa sang iya pusil.
Gintinguhaan sang Pavia police upod ang barangay officials kag pamilya ni Dalisay nga manegosyar siya pero ginpahayag ni Pamplona nga una nagpalupok ang lalaki sang nakita nga ginpalibutan na siya sang police. — Aksyon Paula Elambayo
Makapila nga beses nagpalupok sang pusil si Dalisay sa kapulisan samtang nagbalos man ang tropa tubtob nga na-neutralize siya kag gindala sa ospital.
Samtang sa pagpangusisa sang Aksyon Radyo Iloilo sa barangay, nadakpan sadtu sa buy bust operation si Dalisay kag nakaguwa sang December 2024 paagi sa plea bargaining agreement.
Naka-hospital arrest ang lalaki sa ospital nga may pilas sa wala nga butkon.
