Pulis nga nagresponder sa kinagamo sa Carles nalabuan
ILOILO — Estable na ang kondisyon ni Police Master Sergeant Michael Ilanga nga napilasan sang nagresponder sa kinagamo sa Brgy. Cabilao Grande, Carles sang Sabado.
Suno kay Police Major Sonny Boy Garnace, officer-in-charge sang Carles Municipal Police Station, napilasan sa tiyan, tuhod kag kamot si Ilanga sang ginlabu samtang nagaresponder sa kinagamo.
Magluwas kay PMSg Ilanga, may iban pa nga pilason, suno kay Garnace.
Sa imbestigasyon sang police, papuli na sa Brgy. Cabilao Grande sa amo man nga banwa ang tatlo ka tagreklamo nga kanday alyas William, Christian kag Juny sakay sa motorsiklo.
Samtang nagabiyahe, ginbalabagan sila sang duha ka motorsiklo nga may tagduha ka sakay. Sang nagpondo ang mga motor, nagpanaug ang isa ka sakay kag gulpi ginsumbag si William.
Ginpahayag ni Major Garnace nga nakadalagan si Christian nga nagkadto sa balay sang iya kilala nga si PMSg Ilanga agud magpangayo sang bulig.
Pag-abot nanday PMSg Ilanga sa lugar, wala na ang apat ka mga suspek. Nagtawag gilayon sa Carles police si PMSg Ilanga para magpangayo sang back-up.
Nagpadulong naman sa balay sang mga suspek si PMSg Ilanga upod ang mga tagreklamo. Nahibaluan nga kilalahay ang mga tagreklamo kag mga suspek.
Pag-abot sa balay sang mga suspek sa Brgy. Bancal, naabtan ni PMSg Ilanga ang apat gani nagpakilala siya nga pulis kag gin-imbitar sila sa police station agud mausisa.
Pero ginsumbag siya sang isa sa mga suspek nga nagresulta sa komosyon. Diri na kag nagguwa sa balay ang isa pa ka lalaki nga may bitbit nga binangon.
Nagdalagan pa-talamnan si PMSg Ilanga kag ang mga tagreklamo apang natumba ang pulis rason nga naabtan sang may bitbit nga binangon kag ginlabu.
Tungod sini, gintiro ni PMSg Ilanga ang suspek nga naigo sa tuo nga parte sang tiyan. Naagaw man ni PMSg Ilanga ang binangon.
Ginbuligan nanday Christian kag William si PMSg Ilanga paguwa sa compound. Sang ulihi, nakita si Juny nga kaupod nanday Christian nga pilason.
Gindala sa ospital sa Iloilo City si PMSG Ilanga, samtang yara sa Intensive Care Unit si Juny.
Preso sa Carles Police Station ang apat ka suspek, samtang naka-hospital arrest ang naglabu kay PMSg Ilanga. — Aksyon Paula Elambayo
