Magpamilya nga ma-outing kuntani sa San Joaquin pilason sang nadisgrasya ang ginasakyan nga jeep sa Miagao

ILOILO — Wala na nadayon ang kuntani masadya nga family outing sang magpamilya nga sakay sang jeep sang nadisgrasya sa Brgy. Maninila, Miagao pasado las-8:30 kaina sang aga.

Suno kay alyas Marie, may nabatian sila nga naglagapok sa guwa sang ila balay. Naguwa siya upod ang iban nga miyembro sang iya pamilya agud i-check kon ano ang natabo.

Pag-abot sa lugar, nakit-an ni Marie ang jeep nga nagtakilid, ang mga sakay nga pilason kag mga gamit nga naglinapta.

Sa pagpangusisa sang Aksyon Radyo Iloilo sa lugar, madasig ang pagpadalagan sang jeep samtang nagapadulhog sa kurbadahon nga dalan.

Ginpahayag sang driver sang jeep nga nagpreno siya samtang nagapadulhog pero wala nakontrol ang manibela. Gintinguhaan pa niya nga mawarik sa pihak ang jeep pero naghilay kag nagtakilid.

Suno sa isa sa mga sakay sang jeep, kalabanan sa mga napilasan ang nagasakay sa ibabaw sang jeep nga naga-edad 17-anyos kag panubo.

Nagasakay naman sa sulod sang jeep ang mga may edad na kag mga may dala nga bata.

Pasado las-7 kaina sang aga sang naghalin ang magpamilya sa Brgy. Baong, Alimodian kag pakadto kuntani sa Tobog Beach Resort sa Brgy. Cataan, San Joaquin.

Yara sa 57 ang sakay sang jeep kon sa diin 38 ang pilason nga gindala sa Guimbal District Hospital.

Anum ka miyembro sang pamilya ang gin-refer sa Western Visayas Medical Center sa Mandurriao. — Aksyon Paula Elambayo