Diploma kag card sang SHS graduates sa Col. Ruperto Abellon NS sa Laua-an, Antique gin-hold sang principal
ANTIQUE—Wala ginhatag sa adlaw sang graduation sang Abril 15 ang diploma sang mga naggradwar nga senior high school students sang Col. Ruperto Abellon National School (CRANS) sa Guisijan, Laua-an, Antique.
Ini ang ginkumpirmar ni Laua-an Mayor Aser Baladjay sang personal nga nakig-angut sa mga estudyante kag ginikanan kahapon.
Lakip man sa wala pa nakuha sang mga estudyante ang ila nga card.
Matandaan sa nag-viral nga video sang Principal nga si Ms. Venus Divinia Nietes kun diin ginpa-uba ang toga sa mga estudyante, nagmandu man siya sa mga class advisers nga kuhaon sa certificate holder ang diploma kag isa-isa ini nga ipakuha sa mga estudyante sa iya nga opisina.
Kahapon isa-isa nga nagbalik sa CRANS ang mga estudyante agud kuhaon kuntani ang ila diploma kag card pero sarado ang opisina sang principal.
Indi naman subong makita sa ila nga barangay ang principal, dugang pa sang alkalde.
Ginpabutyag ni Mayor Baladjay nga ginhungod niya nga ipamangkot sa graduates ang parte sa diploma kag card tungod kinahanglan ini nga requirements sa pag-apply sa Government Internship Program (GIP) sang Laua-an LGU.
Gina-offer sang LGU sa mga incoming first year college students ang slot sa GIP agud makabulig sa pagsugod nila sa kolehiyo, paathag sang alkalde.
Tungod sini, nakig-angut na ang alkalde kay Mr. Nicasio S. Prio, Schools Division Superintendent sa Antique agud madasig nga mahatag sa mga estudyante ang ila diploma kag card.
Samtang, ginkumpirmar naman ni Mr. Hernani Escullar, Jr., spokesperson sang Department of Education (DepEd) 6 nga dapat ginahatag sa adlaw mismo sang graduation ang diploma sang mga estudyante. — Aksyon Marvin Malificiar
