Driver sang jeep nga nagtakilid sa Maninila, Miagao nagpadulong sa LTO 6 agud magpaathag sa natabo

ILOILO—Nagpadulong sa Land Transportation Office (LTO) 6 kaina sang aga ang driver sang jeep nga nagtakilid sa Brgy. Maninila, Miagao.

Suno kay LTO 6 Regional Director Gaudioso Geduspan, nagpaathag ang driver sa natabo nga aksidente sang Abril 19, kasunod nga nabaton ang show cause order sang ahensya kagab-i.

Ginkilala ang driver kay Robert Alemania, 36-anyos sang Baong, Alimodian.

Sa pihak sang personal nga pagpadulong sang driver agud magpaathag sa LTO 6, gin-abisuhan siya nga magpasa gihapon sang written explanation sa ahensya sa sulod sang lima ka adlaw.

Una na nga ginpaathag ni Geduspan nga parte ini sang due process, bisan obvious na ang natabo base sa imbestigasyon sang police.

Kon indi maka-feedback ang driver, i-refer ini sang LTO 6 sa legal kag i-resolve ang case. Irekomendar man nga dumilian ang driver nga ma-issuehan sang driver’s license.

Kon mabaton naman sang LTO 6 ang sabat sa show cause order, i-evaluate ang sabat sang driver kag i-resolve sang legal. Diri na istoryahan ang masunod nga lihok sang LTO 6.– Aksyon Farrah Mae Morano