Driver sang SUV nga nag-hit and run sa motorsiklo sa Jaro, nag-surrender sa kapulisan; registered owner sang salakyan, mag-asawa nga Chinese nationals nga gina-ubrahan sang driver — Source
Nag-surrender sa kapulisan ang driver sang SUV nga nag-hit and run sa motorsiklo sa Commission Civil Street, Our Lady of Fatima, Jaro sang Sabado de Gloria, Abril 19 sang gab-i.
Ginkilala ang driver sang Ford Expedition kay alyas RB, residente sang La Paz kag hired driver sang mag-asawa nga Chinese nationals nga registered owner sang salakyan.
Suno kay Police Major Shella Mae Sangrines, spokesperson sang Iloilo City Police Office, nakilala na nila ang driver pero antes pa man siya malab-ut, nagpadulong siya sa police station upod sa iya abogado agud mag-surrender.
Sa impormasyon nga nakuha sang Aksyon Radyo Iloilo, may informant nga nakakita sa kapulisan nga nagatipon sang CCTV footage sa gin-agyan sang salakyan, nga nagpahibalo nga nagsulod ang SUV sa subdivision gab-i sang Sabado de Gloria.
Nagsibo naman ang plate number nga nakuha sang police paagi sa mga CCTV footage nga ila ginpa-verify sa Land Transportation Office (LTO) sa deskripsyon sang salakyan.
Halin sa airport ang driver tungod nagdul-ong sang bata sang mag-asawa nga iya gina-ubrahan pero wala gindiretso pauli ang salakyan.
Tungod tuyo kag kapoy tuga sang mainit nga panahon bilog nga adlaw, napiyungan ang driver rason nga naglapaw siya sa iya linya kag nabungguan ang magpakaisa nga sakay sang motorsiklo.
Sa kakulba nga napatay ukon balikan siya sang iya nabungguan, nagdiretso nalang ang driver kag wala ginbalikid ang natabu.
Ginapreparar na ang kaso nga reckless imprudence resulting in damage to property with physical injuries nga ipasaka batok sa driver. — Aksyon Maria Kayla Tingzon
