Pag-“negosyar” sa driver sang salakyan nga gin-flagdown sang traffic enforcer sa Tabucan, Mandurriao naglawig sang 4 ka oras

ILOILO CITY — Naglawig sang apat ka oras ang pag-negosyar sang traffic enforcer kag sang police sa driver sang salakyan nga gin-flagdown tungod sa violation sa traffic rules sa traffic light sa Brgy. Tabucan, Mandurriao pasado las-4 kahapon sang hapon, Abril 22.

Suno kay Arturo Sajonia Jr. traffic enforcer nga nakadeploy sa area, disregarding traffic signs ang violation sang driver tungod nag-change lane sa tuo ang driver nga ara sa left lane.

Pagpadulog sang traffic enforcer sa driver, ginpahibalo siya sang driver nga naga-Facebook live siya. Pero ang traffic enforcer nagpaathag nga nag-violate siya sa traffic rules.

Nagsabtanay ang traffic enforcer kag ang driver sang salakyan tubtob nga nagtawag sang police.

Wala sa gihapon ginhatag sang driver ang iya driver’s license.

Base sa alegasyon sang driver sang salakyan, wala niya natalupangdan ang traffic signage sa unhan. Ginpanindugan man niya nga wala siya nag-change lane.

Pasado las-8:00 na sang ginhatagan sang citation ticket ang driver sang salakyan tungod sa violation nga may multa nga P200.

Sa paathag sang traffic enforcer indi pwede makaliko ang mga salakyan nga yara sa left lane paglapaw sa traffic signage mga 30 metros ang kalayuon pakadto sa intersection. — Aksyon Paula Elambayo