Call center agent nagreklamo nga ginsapote sang 6 ka lalaki sa San Rafael, Mandurriao
ILOILO CITY — Nagreklamo ang 25-anyos nga lalaki kag call center agent sang ginpahayag ginsapote sang anum ka lalaki sa Brgy. San Rafael, Mandurriao pasado las-4 sang kaagahon kahapon, Abril 23.
Suno kay Jericho, nagalakat siya papuli sa Brgy. San Rafael sang naglabay ang duha ka motorsiklo.
Sa duha ka motorsiklo, tig-tatlo ang sakay nga lunsay mga lalaki.
Una nga naglabay ang duha ka motorsiklo nga nagapaguwa pero nagbalik kag gin-corner ang biktima.
Una nagpanaog ang duha ka sakay sang motorsiklo kag ginkompronta ang biktima tubtob nga nanaog sa motorsiklo ang duha pa ka lalaki.
Nagdalagan ang biktima pero naabutan sang mga suspek kag ginsapote.
Nakuha sa biktima ang cellphone, vape kag grocery para sa iya duha ka bulan nga bata.
Ginpa-blotter na sang biktima ang natabo sa Police Station 10. — Aksyon Paula Elambayo
