20-anyos nga online seller ginsapote sang ka-meet up nga buyer sa Jaro; suspek nakilala na

Ginsapote ang 20-anyos nga online seller sang iya ka meet up nga buyer sa Barangay Tabuc Suba, Jaro kahapon, Abril 25.

Biktima sa insidente si alyas Jan, estudyante nga taga-Benedicto, Jaro.

Suno kay Jan nagkadto siya sa Tabuc Suba, Jaro para i-meet up ang iya buyer nga lalaki nga nagbakal sang hoodie.

Gin-check pa sang buyer ang item kag naga-istoryahanay pa sila ni Jan may kaangtanan sa kundisyon kag materyal sang bayo sang gulpi lang siya ginsumbag kag natumba.

Tungod nagulpihan, wala na nakabato si Jan kag ginsumbag liwat sang suspect.

Nakaagum sang bukol sa likod sang iya ulo ang biktima. May mga gasgas man siya sa kamot kag tuhod tuga sang iya pagkatumba.

Sa pagpanumdom nga may gabuton nga armas ang suspect halin sa iya likod, nagtindog si Jan kag nagsakay sa e-bike sa pagpalagyo.

Nakuha sa biktima ang hoodie nga iya baligya nga nagabalor P1,000, iya suksok nga tsinelas kag earbuds.

NAKILALA NA ANG SUSPEK

Nakilala na ang suspect nga nagsapote sa online seller sang iya gin-meet up sa Tabuc Suba, Jaro.

Suno kay Police Major Eduardo Siacon Jr., hepe sang Iloilo City Police Station 9, ginkadtuan nila ang balay sang suspect nga residente man sang amo nga barangay pero amay kag utod niya ang nag-atubang sa police kag ginpabutyag mga wala siya sa ila balay.

Nahitsurahan ni Jan ang nagsapote sa iya gani nakumpirmar ang identity sang suspect paagi sa mga pictures nga ginpakita sa iya.

Ginpanumduman pa ni Jan ang pagpasaka sang kaso sa biktima.

Kon makadesisyon si Jan nga indi na magpasaka sang kaso, ipa-summon gihapon sa barangay ang suspect agud makaatubangay sila sang biktima. — Aksyon Maria Kayla Tingzon