Driver sang motorsiklo patay sang nadisgrasya sa Santa Barbara

ILOILO — Napatay samtang ginabulong sa ospital ang 23-anyos nga driver sang motorsiklo nga nakabunggo sa depasahero nga jeep sa Brgy. Bolong Oeste, Sta. Barbara Abril 26 sang gab-i.

Ginkilala ni Police Captain Raphy Señeres, officer-in- charge sang Sta. Barbara Municipal Police Station, ang napatay kay Julius Bolivar nga taga-Brgy. Buayahon, Sta. Barbara.

Samtang nakaguwa na sa ospital ang angkas sang biktima nga ginkilala kay Freil Aida Osano, taga-San Dionisio.

Sa imbestigasyon sang police, halin sa direksyon sang Pavia ang motorsiklo kag pakadto sa Sta. Barbara sang nakabunggo sa jeep nga nag-u-turn.

Pakadto kuntani sa Iloilo City ang jeep sang nagdesisyon ang driver nga magpauli gani nagliko sa U-turn slot kag nabungguan sang nagapadulong nga motorsiklo.

Lunsay wala sang suksok nga helmet ang mga biktima, suno sa police. Ginpahayag sang police nga madasig ang pagpadalagan sang motorsiklo.

Wala gin-detain ang driver sang jeep suno sa police, kag may settlement nga na-istoryahan ang pamilya sang mga biktima kag driver sang jeep. — Aksyon Paula Elambayo