29-anyos nga lalaki patay sang gintiro sa Janiuay
ILOILO — Patay ang 29-anyos nga lalaki sang gintiro sang wala pa makilal-an nga suspect sa Barangay Madong, Janiuay las-9:46 kagab-i.
Ginkilala ang biktima kay Rostom Llanora, residente sang Aquino Nobleza West, Janiuay.
Suno kay Police Captain Melvin Mercado, deputy chief sang Janiuay Municipal Police Station, nagahapa sang nakita ang biktima kag yara sa iya tupad ang iya motorsiklo.
Sa imbestigasyon sang police, wala sang nakita nga skid marks ang dalan kag wala man sang gasgas sa lawas ang biktima kag guba ang motorsiklo.
Dugang ni Mercado, may pumuluyo nga nakabati sang isa ka matunog nga lupok pero ginpatihan nila nga poste lang ang naglupok.
Wala man sang nabatian nga komosyon ukon may naga-istoryahanay antes ang insidente.
Ginalantaw sang police nga angkas ukon ginsundan sang suspect ang biktima.
May pilas sa tuo nga porsyon sang likod ang biktima nga ginapatihan igo sang de dose nga pusil suno sa police.
Gindala pa sa ospital ang biktima pero gindeklarar nga dead-on-arrival.
Nagapadayon ang imbestigasyon sang police agud matumod ang suspetsado. — Aksyon Paula Elambayo/Maria Kayla Tingzon
