Lalaki nadakpan nga nagapang-vandal sang road signage sa Jaro kag nakuhaan sang suspected marijuana
ILOILO CITY — Nakuhaan sang suspected marijuana ang 24-anyos nga lalaki nga nadakpan nagpang-vandal sang road signage sa Brgy. Lopez Jaena, Jaro kahapon, Abril 29.
Suno kay Lopez Jaena Punong Barangay Albert Santiago, pasado las-8 kaina sang aga sang gindala ni Councilor Sedfrey Cabaluna ang lalaki sa barangay hall tungod naaktuhan nga nagapang-vandal sang road signage.
Sang gindala sa barangay hall, naglisensya ang lalaki nga makadto sa CR. Tungod wala sang lock ang pwertahan sang CR, nakit-an ni Councilor Cabaluna nga may makaduluda nga ginahimo sa sulod ang lalaki.
Tungod sini, ginsipa ni Councilor Cabaluna ang pwertahan kag nakit-an nga may ginhaboy sa basurahan ang lalaki, suno kay Kapitan Santiago. Sang gin-usisa, may nakita nga plastic sachet sang suspected marijuana sa basurahan.
Nagtawag sa police ang barangay officials kag gindala sa Police Station 9 ang lalaki agud ma-imbestigaran.
Suno naman kay Police Major Eduardo Siacon Jr., officer-in-charge sang Police Station 9, ginpadala sa crime laboratory ang sachet sang suspected marijuana agud ma-check.
Gin-custody sa Jaro Police Station ang lalaki. — Aksyon Paula Elambayo
