Lalaki nga nadakpan sa drug buy bust operation patay sang napilpilan sang patrol car nga nahulog sa tangkungan sa Barotac Viejo

ILOILO — Patay ang lalaki nga nadakpan sang Batad police sa drug buy bust operation samtang pilason ang tatlo ka mga pulis sang nahulog ang patrol car sa tangkungan sa kilid sang karsada nga sakop sang Barangay Natividad, Barotac Viejo mga la-1 kaina sang kaagahon.

Suno kay Police Major Ciriaco Esquilarga, hepe sang Barotac Viejo Municipal Police Station, pabalik sa Batad ang mga pulis pagkatapos ginpa-test sa crime laboratory ang subject sang drug buy bust operation sang wala natalupangdan sang driver ang madalom nga danaw sa karsada gani nasabyahan sang tubig ang windshield sang patrol car.

Nadulaan sang kontrol sa manibela ang driver sang patrol car nga nagdiretso sa duha ka mga poste sa kilid sang karsada.

Naka-atras pa ang patrol car tungod may kable nga nagabalabag sa tunga sang duha ka poste pero nahulog ini sa tangkungan.

Gindala sa ospital ang mga sakay pero gindeklarar nga dead-on-arrival ang subject sang buy bust.

Nagguwa sa imbestigasyon sang police nga napilpilan sang patrol car kag natumbahan sang nautod nga poste ang subject nga nagapungko sa likod.

Nagapabilin sa ospital ang tatlo ka mga pulis nga napilasan. — Aksyon Maria Kayla Tingzon