Magpakaisa nga nag-agaway sang pusil sa Cabatuan pilason sang nalukpan

ILOILO — Pilason ang magpakaisa nga lalaki sang nag-agaway sang pusil sa Brgy. Cagban, Cabatuan kahapon sang kaagahon, Abril 29.

Ginkilala ang biktima kay alyas Rom, 31-anyos samtang ang suspek ginkilala kay alyas Oliver, 45-anyos.

Suno kay Police Captain Aileen Lacrite, officer-in-charge sang Cabatuan Municipal Police Station, papuli na halin sa ilimnan ang biktima kag ang suspek tungod bisperas sang fiesta sa barangay sang natabo ang insidente.

Samtang nagalakat may indi pag-intindihanay nga natabo rason nga gintiro sang suspek ang biktima kag naigo sa likod nga porsyon sang iya lawas.

Pero naigo sa dughan ang suspek tungod nag-agaway sila sang pusil sang biktima.

Gindala sa ospital sa syudad ang suspek samtang sa Iloilo Provincial Hospital sa Pototan ang biktima.

Lunsay estable ang kondisyon sang duha suno sa police.

Kahulugbon sang biktima kag suspek ang motibo sa natabo suno kay Lacrite. — Aksyon Paula Elambayo