Lalaki nga nagtuyo tabukon ang Guimaras halin Oton na-rescue; Lalaki nagrason nga wala sang inugplete

ILOILO — Wala sang inugplete ang rason sang lalaki kon ngaa naghimo siya sang improvised balsa agud kuntani tabukon ang Guimaras halin sa Oton sang Sabado sang aga.

Naghalin sa baybayon nga sakop sang Brgy. Poblacion South, Oton si alyas Jose nga nagpakilala nga taga-Guimaras.

Suno kay Poblacion South, Oton Punong Barangay Daniel Palma, nakit-an sang barangay tanod si Jose nga nagasakay sa tatlo ka mga gintabid nga kawayan gani nag-conduct sang rescue operations ang Oton Search and Rescue Team (OSART).

Sang na-rescue si Jose, may nakuha nga tatlo ka mga empty gallon sang tubig nga nahigot sa iya knapsack.

Gindala sa Oton Municipal Police Station si Jose para makuhaan sang impormasyon pero lain-lain nga ginasabat niya sa police. Nagpahayag si Jose nga wala siya sang inugplete agud magpauli sa Guimaras.

Naglakat man ang lalaki pagkatapos ginkuhaan sang impormasyon kag wala na ginpunggan sang police.