Delivery rider patay sang gintiro sa La Paz

ILOILO CITY — Patay ang 34-anyos nga delivery rider sang gintiro sa Barangay Tabuc Suba, La Paz mga las-10 kagab-i.

Suno kay Police Major Tranquelino Querubin Jr., officer in charge sang La Paz Police Station, naga-inom sa balay sang iya abyan ang suspect nga si Ronaldo Jeruta sang nabatian nga may naglagpok sa atop sang balay.

Nagguwa si Jeruta kag nakita ang biktima nga si Ricky Doronilla, kag iya ginpasibangdan nga amo nagpanghaboy sa balay.

Ginpanginwala ini ni Doronilla nga nagapanghimos na sang lamesa tungod tapos na sila inum-inom sang iya utod.

Naglawig naman ang ila istoryahanay tungod ginabais ni Jeruta nga si Doronilla ang nanghaboy.

Nagpatunga ang abyan ni Jeruta sa komosyon kag nagsiling nga posible bunga sang acacia lang ang nahulog sa atop.

Pagtalikod sang abyan ni Jeruta, nakabati na lang siya sang sunod-sunod nga lupok kag nakita nga may pilas sa dughan kag paa si Doronilla.

Nagpalagyo ang suspect pagkatapos sang insidente.

Gindala pa sa ospital ang biktima pero gindeklarar nga dead-on-arrival.

Na-recover sa lugar ang walo ka basiyo, isa ka slug kag fragments sang bala nga nagasibo sa 9mm nga pusil. — Aksyon Maria Kayla Tingzon