Driver sang motorsiklo patay sang nalasakan sang 10-wheeler truck sa Jaro
ILOILO CITY — Patay ang driver sang motorsiklo sang nalasakan sang 10-wheeler truck sa Barangay Balabago, Jaro kahapon, May 6.
Suno kay Police Executive Master Sergeant Arvin Duero sang Traffic Enforcement Unit sang Iloilo City Police Office, wala natalupangdan sang driver sang 10-wheeler truck nga naglusot sa iya kilid ang motorsiklo.
Halin sa direksyon sang Balabago, Jaro ang duha ka mga salakyan kag pakadto sa direksyon sang Buhang.
Nagaguwa sa imbestigasyon sang police nga pareho nga yara sa outer lane ang mga salakyan.
Nakita naman nga sa likod ang damage sang motorsiklo kag yara sa wala nga porsyon sang unahan nga bumper ang guba sang truck.
Base sa alegasyon sang driver sang truck, ginpahayag sang police nga nakibot ang driver nga naglusot sa wala niya ang motorsiklo gani wala natalupangdan tungod yara siya sa kurbadahon nga porsyon sang dalan.
Pilas sa ulo ang naagum sang driver sang motorsiklo nga gindeklarar dead-on-arrival sa ospital. Samtang may gasgas sa nagkalain-lain nga parte sang lawas ang driver sang truck.
Sa pagpangusisa sang Aksyon Radyo Iloilo News Team sa asawa sang driver sang motorsiklo, pakadto ang iya bana sa Quintin Salas, Jaro sa diin siya nagatrabaho bilang insurance agent sa mga salakyan sa kilid sang Land Transportation Office (LTO) 6.
Arestado ang driver sang truck samtang ginahulat ang desisyon sang pamilya sang driver sang motorsiklo nga magpasaka sang kaso. — Aksyon Maria Kayla Tingzon
