Police Regional Office 6 preparado na para sa May 12 national and local elections
ILOILO — ILOILO— Plastado na ang kapulisan sa Western Visayas para sa May 12 midterm elections.
Suno kay Police Regional Office 6 Regional Director Brigadier General Jack Wanky, preparado ang kapulisan sa rehiyon para magbantay sa nagakatabo sa rehiyon ilabe na sa 2,854 ka voting centers.
Magluwas sa kapulisan nga naka-deploy na sa kada probinsya, gin-deploy man subong nga adlaw ang 1,528 ka pulis halin sa nagkalain-lain nga units para mag-augment.
Ma-augment ang 1,140 ka pulis sa Iloilo Police Provincial Office (IPPO) kag 388 ang ipadala sa Antique Police Provincial Office.
Ginpaathag ni Wanky nga ang duha ka probinsya ang nagakinahanglan kag ginakulang sang police gani naghatag sang augmentation ang PRO 6.
Ginpahanumdom sang PRO 6 ang kapulisan sa mga dapat ubrahon kag nga ginabawal sa tion sang eleksyon.
Lakip sa mga pahanumdom sa police nga magsuksok sang proper uniform; mag-maintain sang 50-meter distance sa voting centers; mangin matinahuron kag magsunod sa PNP Police Operational Procedure and Standard Operating Procedures (SOPs); maggiya kag magbulig sa mga botante ilabe na sa mga senior citizens, nagabusong, kag persons with disabilities sa guwa sang voting centers; likawan nga magpangilkil kag magpang-harass sa mga organized groups; kag istrikto nga mag-obserbar sang non-partisanship kag iban pa. — Aksyon Farrah Mae Morano
