2 ka hepe sa Iloilo province gin-relieve — IPPO
ILOILO— Duha ka hepe sa probinsya sang Iloilo ang gin-relieve lima ka adlaw antes ang May 12 elections.
Ginkumpirmar ni Police Lieutenant Colonel Arnel Solis, spokesperson sang Police Regional Office (PRO) 6, nga gin-relieve kanday Police Major Kenn Albert Lepsia, hepe sang Dumangas Municipal Police Station, kag Police Captain Cedric Cruz sang Barotac Nuevo MPS.
Sayluhon ang duha sa Iloilo Police Provincial Office (IPPO) Headquarters, suno kay Solis.
Mabulos nga hepe sang Dumangas MPS si Major Harold Rendora nga halin sa IPPO Headquarters, samtang si Captain Johnny Oro nga deputy sang Carles MPS ang mapungko nga hepe sang Barotac Nuevo MPS. Mabulos nga deputy sang Carles MPS si Liutenant Patrick John Alabado halin sa 1st Iloilo Provincial Mobile Force Company.
Indi makumpirmar ni Solis kon maangut sa eleksyon ang pag-relieve sa ila pero ginpabutyag niya nga bisan ano nga adlaw nakahanda ang kapulisan sa pag-relieve sa mga hepe. — Aksyon Farrah Mae Morano
