Balay sa Oñate de Leon, Mandurriao nasunog

ILOILO CITY — Wala gid sang may nasalbar nga gamit ang tag-iya sang balay nga nasunog sa Rojo Subdivision, Brgy. Oñate de Leon, Mandurriao kahapon sang aga, Mayo 7.

Suno kay alyas Josie, nakahingagaw sila guwa tanan lakip ang duha niya ka bata, tiya kag amay sang nagdaku ang kalayo.

Ginpahayag niya nga may gina-welding sa ginapa-obra nila nga balay gani ginapatihan niya nga nag-agsik ang baga, nagmakot kag nagkalayo tubtob nga nagdaku.

Naglain ang pamatyag ni Josie kag iya tiya gani ginhatagan sila sang first aid sang taga-Phil. Red Cross. Gindala man sa ospital ang iya tiya nga may balatian. — Aksyon BBB