Driver sang motorsiklo nga naglabay sa Comelec checkpoint sa Dungon A, Jaro nakuhaan sang marijuana kag suspected shabu
ILOILO— Nakuhaan sang suspected marijuana kag shabu ang driver sang motorsiklo nga naglabay sa COMELEC checkpoint sa Brgy. Dungon A, Jaro las-12:15 sang kaagahon.
Suno kay Police Major Eduardo Siacon Jr, hepe sang Iloilo City Police Station 9, halin sa Ungka area ang driver nga si Fermar Andrade kag papuli na sa San Juan, Molo sang naglabay sa checkpoint.
Una nga nagpondo sa slow down section ang driver kag ginpa-forward sang checkpoint team sa tunga, suno kay Siacon.
Ginpahayag ni Siacon nga nagasala na ang lalaki sang nagpalapit sa police gani ginpamangkot siya kon may driver’s license.
Sang nagahana na nga buksan sang driver ang iya nga sling bag nasiplatan sang police ang zip lock nga may sulod nga suspected marijuana.
Gin-hold sang police ang driver kag gintawag ang iban nga miyembro sang checkpoint team.
Sang ginbuksan ang sling bag nadiskubrehan ang madamo nga pack sang suspected marijuana kag shabu, suno kay Siacon.
Nakasulod sa zip lock ang marijuana kag gindoble putos sa itom nga plastic nga may packing tape. Magluwas diri may nakita man nga sachets sang suspected shabu sa sulod sang iya nga bag.
Ginabanta sa 74.9 grams ang kabug-aton sang anum ka pakete sang marijuana nga may standard drug nga P14, 980.
Ginabanta naman sa 2.4 grams ang kabug-aton sang pito ka sachets sang suspected shabu nga may standard drug price nga P16, 320.
Sa pagpangusisa sang police, gina-deliver lang sang driver ang illegal drugs, depende sa ginasugo sang iya nga boss nga katransaksyon lang online. Gina-drop lang sang driver sa lugar kon diin ginasugo sang iya nga boss ang illegal drugs.
Isa pa lang ka bulan nga naga-deliver sang illegal drugs ang driver, suno sa police.
Nagpamalibad nga maghatag sang pahayag ang lalaki sang ginpamangkot sang Aksyon Radyo Iloilo News team. — Aksyon Farrah Mae Morano
