[Warning: mention of rape] 19-anyos nga babaye nagreklamo nga gintuyo himuslan sang gin-hire niya nga motorcycle rider

ILOILO — Nakaluwas ang 19-anyos nga babaye sang tuyo himuslan sang gin-hire niya nga motorcycle rider nga ginsakyan niya pauli pakadto sa iya boarding house sa Pavia.

Natabo ang insidente pasado las 10 kagab-i, Mayo 18 sang nag-abot ang tagreklamo sa bus terminal sa Iloilo City halin sa Passi City.

Suno kay alyas Marie, wala na siya sang masakyan nga jeep pakadto sa iya boarding house gani nag-chat siya sa iya kilala nga motorcycle rider for hire agud magpadul-ong.

Samtang nagabiyahe sila, naghambal ang rider sa tagreklamo nga may hapitan lang, pero nagpabutyag ang tagreklamo nga idiretso lang siya anay sa iya boarding house.

Pero wala nagpamati ang rider kag sa baylo, gindiretso ang tagreklamo sa likod sang mall nga sakop sang Pulo Maestra Vita, Oton.

Sa panaysayon sang tagreklamo, pag-abot sa madulom nga parte sang lugar, nagdulog ang motorsiklo, nagpanaug ang rider kag nagpungko sa kilid sang dalan.

Naghambal suno sa iya ang rider nga mag-iping pungko sa iya.

Nagbalibad ang babaye gani ginbutong siya sang rider kag ginyudyod siya pakadto sa talamnan kag gintuyo nga himuslan.

Natabuan naman nga may naglabay nga nakamotorsiklo nga lalaki sa lugar gani nagsinggit ang tagreklamo.

Nagpakuno-kuno pa ang naka-motor nga pulis gani nakakita sang tsansa ang tagreklamo, ginsipa ang rider kag nagdalagan pakadto sa nagbulig. — Aksyon Khenjo Terco

Nakapalagyo ang ginareklamo nga rider.

Suno sa tagreklamo, nakaagi na sadtu dul-ong sa iya ang amo nga rider. Gin-ako man niya nga masami naga-chat sa iya ang rider kag nagapanghagad pa nga maglagaw sila.

Ginpa-blotter sang tagreklamo ang insidente sa Oton Police Station.

Ginpabutyag sang tagreklamo nga pagkatapos sang natabo, naga-chat sa iya ang rider kag nagapangayo sang pasaylo.