Driver sang motorsiklo patay sang nakasaga-id sa isa pa ka motorsiklo sa Dueñas
ILOILO– Patay ang driver sang motorsiklo sang nakasaga-id sa isa pa ka motorsiklo kag nagtabog sa Barangay Capuling, Dueñas kagab-i.
Suno kay Police Executive Master Sergeant Sherwin Celda, imbestigador sang Dueñas Municipal Police Station, nagapakadto sa banwa ang motorsiklo nga ginamaneho ni alyas Mark, 33, sang Barangay Calacaan, Dueñas antes ang insidente.
Base sa imbestigasyon sang police, nasaga-iran ni Mark ang ginasundan nga motorsiklo.
Tungod sini, pareho nga nagtabog si Mark, ang driver sang motorsiklo nga nasaga-iran nga si alyas Remuel, 20, sang Brgy. Anjawan, Dueñas; kag angkas ni Remuel nga si Junjun, 18, residente sang Poblacion B, Dueñas.
Gindala sa Don Valerio Memorial District Hospital sa Passi City si Mark pero napatay samtang ginabulong sa ospital tungod sang pilas sa ulo, suno sa police.
Lunsay wala sang ginasuksok nga helmet ang mga involved sa aksidente. — Aksyon Farrah Mae Morano
