2 ka motorsiklo sa Molo nasunog; Mga tag-iya nagapati nga ginhungod ini
ILOILO CITY — Nagapati ang mga tag-iya sang duha ka motorsiklo nga ginhungod ang pagsunog sang ila motorsiklo sa Brgy. Salvacion Habog-Habog, Molo kahapon sang kaagahon, Mayo 20.
Suno kay alyas Toto, tag-iya sang totally-damaged nga motorsiklo, adlaw-adlaw niya gina-park sa bakante nga lote sang ila barangay ang iya motorsiklo nga Honda ADB 160.
Wala pa isa ka bulan ang iya motorsiklo nga hulugan ang pagbayad.
Ginpabutyag ni Toto nga nagakatulog sila sang nahibaluan nga nagakasunog na ang iya motorsiklo.
Suno naman kay alyas Boy, tag-iya sang partially-damaged nga motorsiklo nga naulamid sa sunog, naga-atubangay ang ila motorsiklo sang ginpark sa lugar gani naglaton ang kalayo.
Sa pagpangusisa sang Aksyon Radyo Iloilo sa barangay, wala sang CCTV camera sa lugar tungod naguba sang 2023.
Wala pa mahibaluan kon sin-o ang may kahimuan sa natabo tungod wala sang witness kag ebidensya.
Sa imbestigasyon sang Bureau of Fire Protection-Iloilo City, indi pa ma-establisar ang ginhalinan sang kalayo pero wala ginadula ang posibilidad nga ginhungod ang natabo ukon electrical in nature ang rason sang sunog. — Aksyon Paula Elambayo
