Motorcycle rider nga ginreklamo nagtuyo maghimulos sa 19-anyos nga pasahero sa Oton, natukiban nga may asawa na
ILOILO — Kasado na ang motorcycle rider nga ginreklamo sang 19-anyos nga si Alyas Marie nga nagtuyo maghimulos sa iya sa kahilamunan sa Brgy. Pulo Maestra Vita, Oton sang Domingo, Mayo 18.
Ini base sa pagpangusisa sang Aksyon Radyo Iloilo news team sa barangay sa first district sang Iloilo sa diin naga-estar ang rider.
Suno kay Alyas Bert, tiyo sang rider, may kaugalingon nga balay sa ila barangay ang iya hinablos kag asawa niya. Antes nangin rider for hire, nagtrabaho bilang call center agent ang ginareklamo.
Abril 27 pa sang katapusan nga nagpauli ang rider sa ila balay. Ini tungod may balay pa gid sila sa pihak nga barangay, suno sa tiyo.
Sang natribukaho ang alegasyon ni Alyas Marie, nag-chat pa ang rider sa iya nga nagapangayo sang pasensiya tungod sa natabo. Nagpahayag pa suno kay Marie, ang lalaki nga handa siya nga magpangaluyag sa iya.
Una na nga nagpautwas ang rider nga nahulog ang iya buot kay Marie sang ginhatagan siya sang burger sang una nga nagsakay sa iya ang dalaga. Antes ang tuyo nga pagpanghimulos, nakaagi na gin-hire ni Marie ang rider.
Sang Domingo, nag-abot sa bus terminal sa Jaro si Marie halin sa Passi City. Tungod wala na sang may masakyan, nag-chat siya sa rider agud nga i-hire padulong sa Pavia. — Aksyon Paula Elambayo
