Motorcycle rider nga ginreklamo nagtuyo maghimulos sa iya pasahero sa Oton nakilala na
ILOILO — May identity na ang Oton police sang motorcycle rider nga ginreklamo nagtuyo himuslan ang 19-anyos nga babaye sa Barangay Pulo Maestra Vita, Oton sang Domingo sang gab-i, Mayo 18.
Suno kay Police Captain Lunelyn Talamillo, deputy chief sang Oton Municipal Police Station, nakilala nila ang ginareklamo nga rider paagi sa pagpangusisa sa rider community sa ila lugar gamit ang plate number nga nalitratuhan kag motorsiklo nga nakita sang lalaki nga nagbulig sa tagreklamo.
Sang nakuha sang police ang ngalan sang rider, gin-search nila sa Facebook kag sang nakakuha sang picture ginpakita sa tagreklamo.
Positibo nga natumod sang tagreklamo nga ang amo nga Facebook user ang rider nga gin-hire niya pero ginpabutyag ni Talamillo nga ginahulat pa nila ang impormasyon halin sa Land Transportation Office (LTO) may kaangtanan sa registered owner sang motorsiklo nga magaserbe kumpirmasyon sa identity sang ginareklammo.
Sa pagpangusisa sang police sa mga motorcycle riders nga nakuhaan nila sang impormasyon, wala sang gina-updan nga grupo ang ginareklamo nga rider kag nagapatabu-tabo lang ang iya pagbiyahe.
Padayon nga ginatul-id sang kapulisan ang identity sang ginareklamo nga rider agud gilayon mapasakaan sang kaso sa tion nga makumpleto ang mga ebidensiya. — Aksyon Maria Kayla Tingzon
