Dismissed police officer nakuhaan sang suspected shabu sang ginserbihan sang search warrant sa City Proper
ILOILO— Arestado ang dismissed police sang nakuhaan sang suspected shabu sang ginserbihan sang search warrant sang City Drug Enforcement Unit (CDEU) subong nga aga sa Zone 1 Veterans Village, City Proper.
Subject si Joel Destacamento, 58-anyos nga residente sang nasambit nga barangay.
2005 sang na-dismiss sa serbisyo si Destacamento sa rangko nga Police Staff Sergeant.
2020 sang nadakpan sa drug buy bust operation ang subject kag nakaguwa sa presuhan sang 2022.
Na-recover ang ginabanta 100grams sang suspected shabu nga may standard drug price nga P680,000.
“MAS MADANLOG PA SIYA SA PANTAT”
Mabudlay dakpon ang dismissed police nga subject sa search warrant sang City Drug Enforcement Unit (CDEU) sa Veterans Village, City Proper.
Suno kay Lt Joelie John Bandojo sang CDEU, nag-apply sila sang search warrant sa balay ni Destacamento tungod mabudlay dakpon sa drug buy bust operation.
“Gin-search warrant naton kay mabudlay naton siya madakpan sa guwa kay kadasig sa iya magdalagan. Tapos indi naton matigayon nga ma-recover ang iya suspected shabu kay ara mismo sa balay niya ginatago,” suno kay Bandojo.
Isa ka bulan nga gin-monitor sang police ang subject kasunod sang nabaton nga impormasyon halin sa concerned citizen nga naga-engage si Destacamento sa illegal drugs.
“Kon mag-meet up siya sa iban nga lugar dayon siya nga nagapalagyo kay bilang isa ka police officer bal-an niya ang hulag man sang mga manugdakop so natun-an niya nga mas madanlog pa siya sa pantat,” suno kay Bandojo.
Nagahalin sa Muntinlupa City ang supply sang illegal drugs.– Aksyon Farrah Mae Morano
