4 ka solterito nagpalagyo sa Balay Dalayunan sa Lapuz; 2 sa 4 ka menor-de-edad ginbalik sang ila ginikanan

ILOILO CITY — Ginbalik sang ila ginikanan ang duha sa apat ka mga children in conflict with the law (CICL) sang nagpalagyo sa Balay Dalayunan sa Bo. Obrero, Lapuz kahapon sang kaagahon, Hunyo 6.

Lakip sa mga nagpalagyo ang isa ka 15-anyos, duha ka 16-anyos, kag isa ka 17-anyos. Sa pagpanguisa sang mga social workers, nag-agi sa likod nga porsyon sang Balay Dalayunan ang apat rason nga nakapalagyo.

Suno kay Ms. Rufel Baldevieso, center director sang Balay Dalayunan, nagpauli sa ila balay ang 15-anyos kag duha ka 16-anyos. Samtang, nagdiretso naman sa balay sang iya live-in partner ang 17-anyos.

Sa ginhimo nga case conference sang mga social workers sa mga menor-de-edad, ginpabutyag sang 17-anyos nga solterito nga nahidlaw siya sa iya live-in partner sang lima na ka tuig gani nga didto siya nagdiretso.

Kahidlaw naman sa ginikanan ang rason sang 15-anyos sa iya pagpalagyo.

Nagdangup sa police ang iloy sang live-in partner sang 17-anyos rason nga nakabalik siya sa Balay Dalayunan. Gindul-ong naman sang iya ginikanan pabalik sa Balay Dalayunan ang 15-anyos.

Padayon ang koordinasyon sang mga social workers sa ginikanan sang duha pa ka mga menor-de-edad agud mabalik sila sa pasilidad.

Suno kay Baldevieso, nagpasalig ang ginikanan sang duha ka 16-anyos nga ibalik nila sa pasilidad ang kabataan kon magbalik sa ila balay.

Nagpauli ang duha sa ila tagsa ka mga balay pero sang nahibaluan nga nagpakig-angut ang mga social workers sa ila ginikanan, pareho sila nga nangin dulaan. Wala pa sang ideya ang mga ginikanan kon diin na ang duha ka solterito.

Ginpahayag ni Baldevieso nga may tiempo sa isa ka adlaw nga ginhatag sa mga CICLs agud maka-istorya sa ila pamilya paagi sa pagtawag ukon video call. — Aksyon Maria Kayla Tingzon