Porsyon sang rooftop sang Westown Hotel sa Mandurriao nasunog; P6.8 million nga kahalitan ginbilin sang sunog
Naglab-ot sa P6.8 million ang ginbilin nga kahalitan sang sunog nga nagluntad sa Westown Hotel sa Mandurriao kahapon, Hunyo 6.
Suno kay FO2 Earl Anthony Darroca, imbestigador sang Iloilo City Fire Station, nakitaan sang daku nga damage ang cell site sang Smart nga telecommunications company nga naga-arkila sa rooftop sang hotel.
Nasunog man ang storage room sang hotel sa diin nahamtang ang mga foam, habol, bedsheets kag mga tools nga ginagamit sa maintenance.
Ginpabutyag ni Darroca nga may bombero nga nakaagum sang first degree burn sang natuluan sang naglunay nga plastic ang iya kamot samtang nagaresponder sa sunog.
Padayon pa nga gina-imbestigaran sang mga bombero ang ginhalinan sang sunog.
Naglawig sang malapit duha ka oras ang pagpalong sa kalayo tubtob gindeklarar nga fire out las-12:45 sa hapon.
