2 sa apat ka CICLs nga nagpalagyo sa Balay Dalayunan sa Lapuz nakabalik na
ILOILO CITY — Nakabalik na sa kustodiya sang Balay Dalayunan sa Brgy. Bo. Obrero, Lapuz ang duha sa apat ka mga children in conflict with the law (CICLs) nga nakapalagyo sang Hunyo 6.
Ini ang ginkumpirmar ni Ms. Rufel Baldevieso, central head sang Balay Dalayunan.
Suno kay Baldevieso, kahapon sang hapon nakabalik sa pasilidad ang duha ka mga solterito kaupod ang ila mga ginikanan.
Ini tungod sa koordinasyon sang barangay council, district social workers kag Women and Children Protection Desk sang Iloilo City Police Office.
Dugang pa ni Baldevieso, nagpuli sa ila balay ang duha ka mga solterito sang nakapalagyo sa pasilidad tungod nahidlaw sa ila mga ginikanan.
Ginpabutyag ni Baldevieso nga may himuon nga case conference buwas upod ang apat ka mga CICLs, ila mga ginikanan, barangay council, district social workers kag WCPD agud maistoryahan ang ihatag nga intervention. — Aksyon Paula Elambayo
