Lalaki nga ginreklamo sa tuyo nga paghimulos sa asawa sang iya kasilingan sa Concepcion, Iloilo nalabuan sang bana sang tagreklamo

ILOILO — Pilason ang 42-anyos nga lalaki sang ginlabu sang bana sang iya kasilingan sa Brgy. Plandico, Concepcion, Iloilo kahapon sang kaagahon, Hunyo 8

Ginkilala ang lalaki kay alyas Ryan samtang si alyas Eduardo naman ang 76-anyos nga bana nga naglabu sa iya.

Base sa imbestigasyon sang police, antes ang pagpanglabu, gintuyo nga himuslan ni Ryan ang 65-anyos nga asawa ni Eduardo.

Sa pag-imbestigar ni Police Staff Sergeant Eduard Magluyan, imbestigador sang Concepcion Municipal Police Station, nagakatulog sa sulod sang iya kwarto ang asawa sang nagsulod si Ryan.

Nag-agi si Ryan sa tiyangge sang mag-asawa nga nagatapik lang sa ila balay.

Ginpahayag sang police nga nakabugtaw ang asawa sang gintuyo siya nga himuslan ni Ryan gani iya gintiklod.

Naglumpat sa bintana si Ryan para magpalagyo.

Naglawig sang karbaw si Eduardo gani wala siya sa ila balay sang nagsulod si Ryan.

Nabatian ni Eduardo ang pagpangayo sang tabang sang iya asawa gani nagdali-dali siya pauli kag naabtan si Ryan nga nagapaguwa sa bintana gani iya ginlabu.

Naigo sa tuo nga abaga si Ryan nga yara sa impluwensiya sang makahulubog nga ilimnon, suno sa police. May magagmay man siya nga mga pilas sa ulo.

Nakapalagyo pa si Ryan pero nakit-an siya sang mga residente gani na-aresto siya sang mga pulis.

Gindala sa ospital si Ryan agud matahi ang pilas sa abaga. Indi man malala ang mga pilas ni Ryan gani ginbalik siya sa police station agud i-detain.

Gin-detain man si Eduardo.

Desidido ang asawa ni Eduardo nga pasakaan sang kaso si Ryan, suno sa police. — Aksyon Paula Elambayo