Menor-de-edad nga lalaki patay sang nakuryente samtang nagapalupad sang burador sa Alimodian
ILOILO — Patay ang 12-anyos nga lalaki sang nakuryente samtang nagapalupad sang burador sa tunga sang talamnan sa Brgy. Ubodan, Alimodian pasado las-12:30 kaina sang udto.
Suno kay Police Captain Marion Asparo, officer-in-charge sang Alimodian Municipal Police Station, las-12:50 kaina sang udto sang gin-report sa police station ang insidente.
Sa imbestigasyon sang police, nagpalupad sang burador ang biktima sa talamnan sang nakasangit sa kable sang kuryente.
Tungod sini, posible ginbutong sang biktima ang burador agud makuha sa kable sang kuryente sang natumba ang tukon gani nagluyloy ang kable kag nauyatan sang biktima.
May tukon ang kable sang kuryente nga naga-angut sa poste pakadto sa balay sa lugar suno sa police.
May mga paso sa dughan kag sa kamot ang biktima sang nag-responde sa lugar ang kapulisan.
Ginpabutyag ni Captain Asparo nga nag-ulan kaina sang aga pero nagnami ang tyempo gani posible naengganyo ang biktima nga magpalupad sang burador.
Gindala sa ospital ang biktima pero gindeklarar nga dead-on-arrival. — Aksyon Paula Elambayo
