Iloilo province may pinakamadamo nga HIV cases sa Western Visayas — PHO

Nagapanguna ang Iloilo Province sa may pinakamadamo nga kaso sang HIV sa Western Visayas base sa report sang Iloilo Provincial Health Office (PHO).

Suno kay Dr. Rodney Labis, head sang Health Service Delivery Division sang PHO, 2,174 na ang kaso sang HIV sa probinsiya base sa data sang DOH halin 1988 tubtob March 2025.

Nagabug-os ini sang 34% sang total cases sa rehiyon.

Halin Enero tubtob Marso subong nga tuig, 111 ka bag-o nga mga kaso ang na-record sa probinsiya.

40 ka kaso naman ang na-record sa probinsiya subong lang nga Marso.

Lakip sa may pinakamadamo nga kaso halin 1988 tubtob Marso subong nga tuig ang mga banwa sang Oton, Pavia, Pototan, Janiuay, Santa Barbara, Dumangas, Cabatuan, Barotac Nuevo, Miagao, kag Lambunao.

Samtang halin Enero naman tubtob Marso subong nga tuig, nalakip sa mga banwa nga highest cases ang Oton, Pototan, Dumangas, Tigbauan, kag Leganes.

Tatlo naman mga banwa ang wala sang na-record nga bag-o nga kaso subong nga 2025.

Ini ang Leon, Alimodian, kag Tubungan. — Aksyon Khenjo Terco

48 KA HIV CASES NA-RECORD SA ILOILO CITY SA FIRST QUARTER SANG 2025

Na-record ang 48 ka bag-o nga kaso sang Human Immunodeficiency Virus (HIV) sa siyudad sang Iloilo halin Enero tubtob Marso subong nga tuig.

Sa 48 ka kaso, 46 ang HIV positive nga lalaki samtang duha ang babaye.

Suno kay Dr. Odeta Villaruel nga chief sang Social Hygiene Clinic sa City Health Office (CHO) makit-an nga nagataas ang trend sang infection sa mga lalaki kada tuig.

Sa kabug-usan, may 1,694 ka kaso sang HIV sa siyudad halin sang 1988 tubtob una nga quarter sang 2025.

810 sa amo nga numero ang na-record halin lang sang first quarter sang 2020 tubtob first quarter sang 2025.

Sa 810 ka kaso, pinaka-apektado ang age group nga 25 tubtob 34 nga may 361 ka HIV positive. — Aksyon Marvin Malificiar