Mag-utod nga apo sang barangay kagawad dakup sa drug buy bust operation sa Molo; Mga nadakpan na-aktuhan nga naga-“pot session”
ILOILO CITY — Naaktuhan pa nga naga-pot session ang mag-utod nga lalaki kag duha pa nga upod sa buy bust operation sa Zone 3 Brgy. San Juan, Molo kahapon, Hunyo 11.
Ginkilala ang mag-utod kanday alyas JL kag alyas Jed nga apo sang kagawad sa amo nga barangay. Lakip man sa nadakpan si alyas Eliana nga live-in partner ni JL kag ang parokyano nga si alyas May.
Suno kay Police Lieutenant Lloyd Pagulayan, deputy station commander sang Police Station 4 sa Molo, na-monitor sang isa ka bulan ang ilegal nga aktibidad ni JL nga amo ang main subject.
Base sa monitoring sang police, nagakuha sang supply sang illegal drugs si JL sa iya amay nga amo ang nagakadto agud i-deliver ang mga items.
Si JL naman ang nagabaligya sa ila mga customers.
Ginpahayag ni Pagulayan nga drug surrenderer ang amay ni JL base sa monitoring.
Na-recover ang lima ka gramos sang suspected shabu nga nagabalor sang P34,000.
Ginatinguhaan sang Aksyon Radyo Iloilo nga makuhaan sang pahayag ang barangay kagawad nga lola sang mag-utod nga nadakpan. — Aksyon Paula Elambayo
