Voter registration para sa BSKE sa Iloilo City ibalik sa mga malls
ILOILO CITY—Ibalik sang Commission on Elections (COMELEC) Iloilo City sa mga malls sa siyudad ang voter registration para sa Barangay and Sangguniang Kabataan Elections (BSKE).
Himuon ini sa Festive Walk Mall, SM City Iloilo, Robinsons Place Iloilo, kag Robinsons Place Jaro.
Base sa calendar of events nga ginpaguwa sang COMELEC central office, masugod sa Hulyo 1 tubtob 11 ang voter registration.
Magluwas sa voter registration, i-cater man sang city COMELEC sa mga mall venues ang transfer of voter registration record, correction of entry, kag voter’s records reactivation.
Sa mga maparehistro nga first time voters magdala lang sang bisan ano nga valid ID lakip na ang school ID kag birth certificate.
Ginpabutyag ni Mr. Jonathan Sayno, election assistant officer II nga kabahin lang ini sang pagpanghanda sang komisyon bisan wala pa sang pat-ud kon madayon ang eleksyon sa Disyembre 1. — Aksyon Marvin Malificiar
