3 patay sang nabungguan sang awto sa Cabatuan
ILOILO — Patay ang tatlo ka babaye sang nabungguan sang awto sa higad sang dalan sa Brgy. Pungtod, Cabatuan kahapon, Hunyo 14.
Ginkilala ang mga biktima kanday alyas Berta, 72-anyos; alyas Fely, 58-anyos lunsay taga-Cabatuan kag alyas Heidi, 59-anyos nga taga-Lambunao.
Suno kay Police Captain Aileen Lacrite, officer-in-charge sang Cabatuan Municipal Police Station, nagalakat sa higad sang dalan kanday Berta kag Fely samtang nagapanguha sang plastic bottles si Heidi antes natabo ang aksidente.
Sa imbestigasyon sang police, halin sa Pavia kag papuli na sa Maasin ang 20-anyos nga driver sang napiyungan gani nahulog ang awto.
Tungod sini, nakibot ang driver gani ginkabig niya ang manibela kag nalab-ut ang mga biktima sa higad sang dalan.
Gindala sa ospital ang mga biktima pero gindeklarar nga dead-on-arrival suno sa police.
Detained sa Cabatuan Police Station ang driver sang awto samtang ginahulat ang desisyon sang pamilya sang mga biktima.
Posible mapasakaan sang kaso nga reckless imprudence resulting in multiple homicide ang driver suno sa police. — Aksyon Paula Elambayo
