Masobra P2 million nga balor sang suspected shabu na-recover sa buy bust operation sa Tanza Esperanza, City Proper
ILOILO— Masobra P2 million nga balor sang suspected shabu ang nakuha sang kapulisan sa duha ka pangayaw nga mga lalaki sa drug buy bust operation sa Brgy. Tanza Esperanza, City Proper kaina sang kaagahon.
Nadakpan kanday alyas Jerbelle, 41, sang Brgy Dawis, Dingle; kag alyas Sander, 37, sang Brgy. Malipayon, City Proper.
Suno kay Police Captain Glenn Soliman, head sang Regional Police Drug Enforcement Unit (RPDEU), kagab-i pa nag-umpisa ang transakyon pero nalab-utan sa kaagahon.
Si Jerbelle ang naga-uyat sang daku nga supply sang illegal drugs kag naga-distribute sa probinsya sang Iloilo. Si Sander naman ang naga-distribute sang illegal drugs sa syudad, suno sa pulis.
Sa pagpangusisa sang RPDEU, kon ginakulang sang stocks sang illegal drugs sa probinsya, nagakuha sang stocks si Jerbelle kay Sander.
Gina-monitor sang RPDEU ang source sang illegal drugs sang mga nadakpan. Sa initial nga report, sa Luzon nagahalin ang supply tungod nakaagi na preso si Jerbelle.
Na-recover ang 305grams sang suspected shabu nga nagabalor sang masobra P2 million. — Aksyon Farrah Mae Morano
