Babaye nga ginhal-id sa kamaisan sa San Enrique, Iloilo nakilala na
Nakilala na ang babaye nga ginhal-id sa kamaisan sa Brgy. San Antonio, San Enrique nga nasapwan kahapon sang aga, Hunyo 19.
Ginkumpirmar sang pamilya nga si Hera Torrecampo, 54, sang Boulevard, Molo ang bangkay.
Nagpakig-angut si Jade Beaneza nga bata ni Torrecampo, sa Aksyon Radyo Iloilo sang nakita ang Facebook post may kaangtanan sa tattoo sang biktima.
Gilayon nga ginpadulongan sang pamilya ang San Enrique Police Station kaupod ang Aksyon Radyo Iloilo news team kag ginkumpirmar ni Beaneza nga iloy niya ang bangkay.
Sa interview sa bata, duha ka adlaw na nga wala nakapauli ang iya iloy sa gina-estaran nga balay sa Boulevard. Suno kay Beaneza, pakaisa niya ang kaupod sang iya iloy sa gina-estaran nga balay.
Pero kada adlaw nagakadto ang iya iloy sa gina-ubrahan niya kag nagapangayo sang kuwarta. Ini ang rason nga ginkatingala ni Beaneza nga duha ka adlaw na nga wala nakakadto ang iya iloy.
Kahapon sang hapon, nagpahibalo ang iya tiya nga wala na nakapauli sa ila balay ang iya iloy tubtob nabasahan ang balita nga may nasapwan nga bangkay sa San Enrique ang ang mga tattoo sa lawas, naga-anggid sa iya iloy.
Una na nga ginpahayag sang kapulisan nga ginpatay sa iban nga lugar si Torrecampo kag ginhal-id lang sa nasambit nga barangay.
