Suspek sa pagpatay sa 18-anyos nga dalaga nga nasapwan sa Tubungan nadakpan; suspek nanginwala nga ginhimuslan niya ang biktima

ILOILO— Ginkumpirmar ni Police Captain Albert Manguilimotan, hepe sang Tubungan MPS, nga may nagpadulong sa police station kag nag-ako nga naghimo sang krimen sa 18-anyos nga dalaga sa Brgy. Ingay, Tubungan.

Ginkilala ni Punong Barangay Leonardo Tamises ang nag-ako kay Aljohn Jalbuna, 33-anyos nga residente sang amo man nga lugar.

Nagtawag kaina sang aga ang police kay Tamises kag ginpangita ang balay ni Jalbuna.

Gin-ako ni Jalbuna nga ginpatay niya si alyas Kendi pero ginpanginwala nga ginhimuslan niya.

Sa pagpangusisa ni Tamises, nag-inum-inom si Jalbuna sa balay sang iya nga abyan mga 400 metros ang kalayuon halin sa balay ni Kendi. Upod ni Jalbuna ang iban pa niya nga mga abyan.

Sa pagnagub sang gab-i sang Hunyo 16, nagsulod siya sa kuwarto sang balay sang iya nga abyan pero ginsaway gani nagguwa.

Naglakat siya sa pagpati sang iya nga mga abyan nga mapauli na.

Base sa pag-ako ni Jalbuna, mga las-2 sa kaagahon sang Hunyo 17 samtang nagalakat siya pauli, nalabyan niya ang balay ni Kendi. Naglibot siya sa likod sang balay kag nakit-an nga bukas ang bintana sang kuwarto sang dalaga.

Nagsulod si Jalbuna sa bintana kag nakit-an siya ni Kendi nga sang amo nga mga tiun nagahigda sa iya nga katre. Naghana pa kuntani nga magsinggit si Kendi pero naunahan na sang suspect tabon ang iya nga baba.

Ang katre ni Kendi nahamtang malapit sa bintana kon diin nagsulod sang suspect.

Pag-ako ni Jalbuna, gintiklod niya si Kendi kag nahulog sa iya nga katre.

Hubog ang lalaki sang nagsulod sa balay kag ginhimo ang krimen pero ginpanginwala niya nga ginhimuslan niya si Kendi.

Ginhabulan ni Jalbuna si Kendi kag nagpalagyo base sa iya panaysayon.

Hunyo 17 sang hapon sang nasapwan sa sulod sang iya nga kwarto ang dalaga nga patay na. — Aksyon Farrah Mae Morano